Me patri

Pensu a me patri,
stasira, ca giacca di villutu,
i causi munciuniati,
i manu chini di travagghiu....

M'arricordu quannu
s'arricugghìa ra campagna,
anticchia stancu,
p'aviri zappatu o
sulu pu piaciri
d'aviri carizzatu
i pampini di mannarini.

Poi a Nazionali
aspirata 'nsanta paci
prima di manciari
u cocciu a liva
e u pumaroro 
cu l'ogghiu e u sali.

Poi  'ntò lettu
a ripusari i quattru ossa,
pi dormiri sulu quannu
tutti eramu rintra e
si putia girari
a chiavi a notti.

Chi granni omu era!
Tinia a zappa 'mmanu
cu dda leggerezza
d'una penna, u risu
'nta li labbra,
a frunti larga,
a testa auta.

Pinsannu ca
un c'è cchiù
'u cori chianci,
ma è cuntentu picchì
mi retti a vita e
u sentimentu.

                  Giuseppe Romano
  
19/03/2014